Nekea gutxitzeko dieta osasungarria Esklerosi Anizkoitzean

Elikadura orekatua izatea eta jarduera fisiko erregularra egitea lotuta daude Esklerosi Anizkoitza duten pertsonek nekearen pertzepzio txikiagoa izatearekin. Oinarria fruta eta barazki ugariko dieta bat da, landare- eta animalia-proteinak, karbohidratoak (nagusiki integralak) barne hartzen dituena, kalitatezko koipeak ahaztu gabe, hala nola, oliba-olioak ematen dituenak; gantz, azukre sinple, opil industrial eta koipe ase gutxiko dieta. Baina garrantzitsua da, halaber, nekearekin lotutako mantenugaiak ezagutzea, haien funtzioa zein den eta zer elikagaik dituzten jakitea

Magnesioa

Funtzioa: ezinbestekoa da muskuluek eta nerbio-sistemak behar bezala funtzionatzeko. Gainera, kaltzioa eta fosforoa hortzetan eta hezurretan finkatzen laguntzen du eta erantzun immunologikoan parte hartzen du.

Non dago:

• Fruitu lehorrak (almendrak)
• Espinakak
• Lekaleak
• Patatak
• Ahuakatea

Azido folikoa edo B9 Bitamina

Funtzioa: beharrezkoa da organismoan zelula berriak osatzeko (azala, azazkalak, ilea) eta fetuaren sortzetiko hainbat akats prebenitzeko haurdunaldian.

Non dago:

• Hosto berdeko barazkiak
• Lekaleak
• Intxaurrak
• Ahuakatea
• Esparragoak

Flabonoideak

Funtzioa: oso fitonutriente onuragarriak dira, antiinflamatorio eta antioxidatzaile ahalmena dutelako, eta minbiziaren eta gaixotasun kardiobaskularren prebentzioarekin lotzen dira.

Non daude:

• Brokolia
• Tomatea
• Tipula
• Sagarrak
• Mahatsa
• Kakaoa
• Te berdea
• Ahabiak
• Apioa
• Marrubiak
• Fruitu gorriak

D Bitamina

Funtzioa: kaltzioa eta fosforoa xurgatzen laguntzen du, ezinbesteko elementuak hezurrak ondo mantentzeko. Eguzkitan egonda eta hainbat elikagairen bidez sintetizatzen da.

EAn ohikoa da D bitaminaren gabezia. Gehigarriak espezialistek gainbegiratu behar dituzte, horiek metatzeak nekea eta muskulu-ahultasuna eragin baititzake.

Non dago:

• Arrain urdina (sardinak, izokina, atuna…)
• Arrautza-gorringoa
• Lakteo osoak (esne osoa, gurina)
• Arrain-gibeleko olioak

Kolesterol ona, Esklerosi Anizkoitzak eragindako nekearen kontrako aliatua

Duela gutxi egindako ikerketa baten arabera, dentsitate handiko lipoproteinaren (HDL, “kolesterol ona” esaten zaio) maila altuen eta nekearen murrizketaren artean erlazioa dago, babesgarri gisa jarduten duelako eta dentsitate baxuko kolesterolak (LDL) arteriak kaltetzea edo substantzia kaltegarriak garunean eta bizkarrezur-muinean sartzea eragozten duelako. Kasu honetan, fruta eta barazkiak dira aliatu nagusiak, odoleko kolesterol onaren maila horiek handitzen dituztenak, Esklerosi Anizkoitza duten pertsonen neke-maila murriztuz.